Posted by: lrrp | November 7, 2013

ඒ කාලේ සුද්දොත් මට ඔළුව නැමුවා…..වලව්වේ පරාණකාරයෙක් මුනුපුරාට කියයි

“උදේට ළදරු පාසල්වලට ළමයින් එක්ක එන අම්මලා ළමයින් ළදරු පාසලට දාලා හොර මිනිස්සුත් එක්ක, ත්‍රීවීල් කාරයොත් එක්ක මගේ වලව්වට ඇවිත් දවල් වෙනකම් ලැගලා ඉඳලා යනවා. ඉස්කෝලෙ යන කෙල්ලොත් කොල්ලොත් එක්ක එනවා. කොල්ලො විතරක්යැ සමහර කෙල්ලෝ කසාද බැඳපු මිනිස්සුත් එක්කත් එනවා.

ලොකු ලොකු කොම්පැනිවල රස්සාවල් කරන එකීලත් ඒවයෙ ලොක්කොත් එක්ක ඇවිත් ලැගලා ඉඳලා යනවා. අරක්කු බොනවා. බැදපු මස් මාළු කනවා. මේක මගේ වලව්ව. අම්බලමක් මුඩුක්කුවක් නොවෙයි. මේවා දකින කොට මට උහුලගන්න බෑ” යි තිස්සට ආවිෂ්ට වූ ප්‍රේත ජීවියා කේන්ති ගිහින් කීවේ ය.

“ඒ වගෙ වැඩවලට කොහොම ද වලව්වට එන්නෙ?” ආධ්‍යාත්මික උපදේශකවරයා ප්‍රශ්න කළේය.

“මෙයා මගේ වලව්ව දෙකට බෙදලා එක පැත්තක දැන් හෝටලයක් පටන් අරගෙන. මම මූට ඕවා කරන්න ඉඩ දෙන්නේ නෑ. මම බොහෝ ම නම්බුකාර විදිහට ජීවත්වෙච්ච කෙනෙක්. එහෙනම් කො” යි ප්‍රේත ජීවියා බොහෝම ගාම්භීර ගතියක් පෙන්වමින් කීවේය.

තිස්ස විජේවික්‍රම තිස් හැවිරිදි විවාහකයෙකි. ඔහු පවත්වා ගෙන යන හෝටලය තුළත් ඊට ම යාබද නිවසේත් වැසිකිළි ගඳක් වහනය වීමත්, එහි සේවකයන් හිටි හැටියේ බියවීමත් නිසා හෝටලය පවත්වාගෙන යා නොහැකි තත්ත්වයක් උදාවී ආහාරපාන ගැනීමට හෝ කාමර නවාතැන් සඳහා ගනුදෙනුකරුවන් නොපැමිණීම නිසාත්, නිවැසියන් රාත්‍රි හීනෙන් බිය වී කෑ ගැසීම නිසාත් මහත් දුෂ්කරතාවලට මුහුණ පා සිටියේය.

එසේ ම රෝගාබාධවලට ගොදුරු වී දුකට පත්ව සිටියේය. මේ තත්ත්වයෙන් ගොඩ එන්නට විවිධ පිළිවෙත් ගණනාවක් සිදු කළත් සහනයක් නොලැබුණි. ‘සිළුමිණ’ පත්‍රයේ “පියවි ඇසින් ඔබ්බට” විශේෂාංගය කියවන මිත්‍රයෙකුගේ උපදෙස් මත තිස්ස මිත්‍රයා සමඟ ඇතුල්කෝට්ටේ ගුප්ත ගවේෂණ මධ්‍යස්ථානය සොයා පැමිණියේය.

ගුප්ත ගවේෂණ මධ්‍යස්ථානයට ඇතුළුවන විට ම ඔහු ගේ ඇඟ හිරිගඬු පිපී ගැහෙන්නට විය. ආධ්‍යාත්මික උපදේශකවරයා ඉදිරියේ දිෂ්ටි වැටි ඔළුව වනන්නට වූවා මිස වෙනත් ප්‍රතිචාරයක් නොදැක්වූ බැවින් දින විසි එකක් ගමේ පන්සලේ බෝධි පූජා පවත්වා එන්නැයි උපදෙස් දුන්නේය.

ඊළඟ දිනයේ තිස්ස ප්‍රලය වීය. ගවේෂකවරයා ප්‍රශ්න කළේය.

“කව්ද මේ ශරීරයට ඇතුළු වෙලා ඉන්නෙ?”

“මාව මගේ වලව්වෙන් පන්නන්න ආයෙත් ආවා නේද?”

“ආයෙත් ආවැයි කියන්නේ මීට කලින් මෙහෙට ඇවිත් නැහැනෙ.”

“මෙහෙට නාවත් දේවාල හත අටකටම ගිහින් ලක්ෂ ගණනක් වියදම් කළා මාව පන්නන්න. මගේ වලව්වෙන් මාව පන්නන්න එහෙමත් පුළුවන් ද?”

“ඉතින් මේ කවුද කියලා තව ම කිව්වෙ නැහැනේ.”

“මම මෙයාගෙ සීයගෙත් සීයා.”

“එහෙනම් බොහෝ ම පැරැණියෙක්, තමන් මේ හිරිහැර කරන්නේ පස්වැනි පරම්පරාවෙ දරුවෙකුට, මී මුනුපුරෙකුට.”

“මුන් වගේ අය දරුවො නොවෙයි. පරම්පරාව නැති කරන්න උපන්න හතුරෝ” යි කියා ඉතා තද පරුෂ ලෙස ප්‍රේත ජීවියා තිස්සට බණින්නට විය. අසා සිට බැරි ම තැන ඔහු නිහඩ කර තවත් දින හතක් බෝධි පූජා පවත්වා නැවත එන්නැයි උපදෙස් දුන්නේය.

ඊළඟට පැමිණි දිනයේ ද තිස්ස දිෂ්ටි ගැන්වීය. ඔහුට බලපෑම් කරන භූතාත්මය වැදගත් ලෙස ජීවත් වූවෙකු බව වටහා ගත් උපදේශකවරයා ඔහුට ද නම්බුකාර දී කතා කළේ ය.

“මොකක්ද ඔබතුමාට තියෙන ප්‍රශ්නය මේ මුනුපුරා එක්ක?” යැයි ගවේෂකවරයා ඇසීය.

“අනේ! පුතේ! පුතා දන්නෙ නෑ මූ කරන දේවල්. මූ මගේ වලව්ව දෙකට බෙදලා එක පැත්තක හෝටලයක් දාගෙන.”

“ඉතින් අද කාලෙ හැටියට ව්‍යාපාරයක් වශයෙන් එහෙම කළා ම මොකද?”

“පුතේ! මම බොහෝ ම වැදගත් විදිහට ජීවත්වුණ කෙනෙක්. ඒ කාලෙ සුද්දොත් මට ගරු කළා. මාව දැක්ක ම අශ්වයා පිටින් බැහැලා ඔළුවෙ තියෙන තොප්පිය අතට අරගෙන සුද්දත් ගරු කළා. මගේ පරම්පරාවේ නම්බුව ඔය වලව්ව තමයි.

දැන් ඒක හෝටලයක් කරගෙන මිනිස්සු ඒකට වල් ගෑනු ගේනවා. මස් බැදගෙන කනවා. ඒ විතරක් ද මගේ කාමරෙත් කුලියට දෙනවා. ඒකටත් වල් ගෑනු ඇවිත් ලගිනවා. ඉතින් මගේ පරම්පරාවෙ නම්බුව කෝ? වලව්වෙ නම්බුව කෝ? මූ මගේ නම්බුව නැති කළා.”

“ඔය වලව්වෙ ඔබතුමා වගේ බලවේග තවත් ඉන්නවා ද?”

“නෑ… නෑ… අපේ පරම්පරාවෙ අය නම් නෑ. වෙනත් අය අවට ඉන්නවා. උන් මට බයයි. වලව්ව ඇතුළට එන්නේ නෑ.”

“ඉතින් දැන් මොකක්ද කරන්න කියන්නෙ?”

“මූ මාව පන්නන්න අට වතාවක් උත්සාහ කළා. ඔය මෙතනට ආවෙත් ඒ අදහසින් ම තමයි. මාව එහෙම යවන්න බැහැ. මම යන්නෙත් නෑ.”

“හොඳයි, අපි මුනුපුරා එක්ක සාකච්ඡා කරලා බලමු. ඔබතුමා ඔය ශරීරයෙන් ඉවත් වෙලා අහගෙන ඉන්නකෝ” යි භූතාත්මය ශරීරයෙන් ඉවත්කොට තිස්ස සමඟ සාකච්ඡා කළේය.

තිස්ස ගේ සීයා ගේ සීයා (අත්තා – මුත්තා – නත්තා) වලව්වට ආදරෙන් සිටින බවත් බූදලය පිරිහෙනවාට අකැමැති බවත් ගවේෂකවරයා තිස්සට වටහා දුන්නේය.

“මහත්තයා මට වෙන ආදායමක් නෑ. රස්සාවකුත් නෑ. මම ඕස්ට්‍රේලියාවට ගිහින් හෝටල් පුහුණුව, කළමනාකරණය පුහුණු වෙලා තියෙනවා. මේ වලව්ව නඩත්තු කැර ගන්නත් බැරි තත්ත්වයක යි මම ඉන්නේ. ඒ නිසා හෝටලයක් පටන් ගත්ත එක ඇත්ත.

මම මේ බූදලය විනාශ කළේ නෑ. කිසි දෙයක් විකුණලත් නෑ. තාත්තලා නම් ඉඩකඩම් විකුණලා තියෙනවා. මට ඉතුරු වෙලා තියෙන්නේ මේ වලව්ව විතරයි” කියා තිස්ස තමන් සිටින තත්ත්වය පැහැදිලි කළේ ය.

නැවතත් තිස්ස ගේ ශරීරයට භූතාත්මය දිෂ්ටි ගැන්වීය. ගවේෂකවරයා කතා කළේය.

“දැන් මේ මුනුපුරා කියපු දේවල් අහගෙන හිටියා නේද?”

“ඔව් හොඳට අහගෙන හිටියා.”

“ඉතින් මේ ළමයත් ජීවත් වෙන්න එපායැ. ඒකනෙ මේ තමන් ඉගෙන ගත්ත රස්සාව කරන්නෙ.”

“ඒක ඇත්ත.”

“ඔබතුමා වැදගත් කෙනෙක් නෙ. වැදගත් පරපුරක නම්බුකාර කෙනෙක්, සුද්දොත් ගරු කළා කිව්වනෙ. ඔබතුමාට සුද්දොත් ඔළුව පාත් කරන්න තරම් වැදගත් නම් ඇයි ප්‍රේතයෙක් වෙලා.”

“අනේ! ඒ මොකද?”

“ඒක තමයි තණ්හාව. අපි මැරෙන කොට මේ භවය අතහැරලා වෙනත් භවයකට යනවා. භවය අතහැරලා යනවා නම් තමන් පාවිච්චි කළ ගෙවල් දොරවලුත් අතහැරලා යන්න ඕන. මේ වලව්ව ගැන ආසාවෙන් මළ නිසා ඒ වලව්වේ ම මළප්‍රේතයෙක් වෙලා උපන්නා.”

“අනේ මට යන්න නම් කියන්න එපා. මට මගෙ වලව්වෙ ම ඉන්න ඉඩ දෙන්න.”

“හොඳයි ඉන්න ඉඩ දෙන්නම්. වැදගත් විදිහට ඉන්න ඉඩ දෙන්නම්. හැබැයි වලව්වේ ඉන්න අයට කරදර කරන්න එපා.”

“හොඳයි මම පොරොන්දු වෙන්නම්.”

ගවේෂකවරයා ප්‍රේත ජීවියා තිස්සගේ ශරීරයෙන් ඉවත් කැර තිස්සට උපදෙස් දුන්නේය.

“වලව්වේ ඉස්සරහ කාමරය, මේ මුත්තා හිටියා ය කියන කාමරය, හොඳට ශුද්ධ පවිත්‍ර කොට අලුතෙන් තීන්ත ගා ඒක බුදු කුටියක් බවට පත් කරන්න. හොඳ පිළිමයක් ඒ කාමරයට වඩමවන්න.

මේ පැරැණි මුත්තා ගේ නම සොයා ගන්න. කාමරයේ උලුවස්සට ඉහළින් මුත්තා ගේ නම ලියා ඔහු අනුස්මරණ බුදු කුටිය කියා සඳහන් කරවන්න.”

“ඊට පස්සෙ සෑම දිනකම උදේ හවස පන්සිල් සමාදන් වී සුවඳ මල් පහන් පූජා කරන්න. තුන් සූත්‍රය සජ්ඣායනා කර මෛත්‍රී භාවනාව වඩන්න. අවසානයේ දස දිසා පිරිත සත් වරක් කියා දෙවියන්ට පින් දෙන්න.

මේ මුත්තාටත් පින් දී මෙවැනි වලව්වක් උරුම කැර දුන්නාට ස්තුති කරන්න. ඒ පින් බෙලෙන් මුත්තාට දිව්‍යාත්ම භාවයක් ලැබී මීට වඩා උසස් දිව්‍ය මාලිගාවක් ලැබේවා යි ප්‍රාර්ථනා කරන්නැ” යි උපදෙස් දුන්නේය. නැවත දිෂ්ටි ගන්වා මේ පාරම්පරික පැරැණි ඥාතියාට ඒ බුදු කුටියට ම වී ඉන්නැයි නියම කළේය.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: